Leikfélag Akureyrar - LA

7.-9. MAÍ
Vegna mikillar eftirspurnar hefur  Leikfélag Akureyrar ákveðið að halda suður á bóginn og sýna 39 ÞREP í Íslensku óperunni í maí.  Uppselt var á nær 50 sýningar hér á Akureyri  og gagnrýnendur á einu máli: „Stórkostleg sýning“.  Í þessum óborganlega gamanleik  fara 4 leikarar á kostum í 139 hlutverkum. Leikstjóri er María Sigurðardóttir en hún leikstýrði einnig hinum vinsælu sýningum SEX Í SVEIT og FLÓ Á SKINNI.

39 ÞREP er nýlegur gamanleikur eftir Patrick Barlow, sem byggður er á hinni þekktu kvikmynd  Alfred Hitchcock, eftir samnefndri skáldsögu John Buchan.  Þar segir frá hinum dekraða glaumgosa Richard Hannay, sem er vanur ljúfu lífi bresku yfirstéttarinnar, en sogast skyndilega inn í æsispennandi atburðarás þar sem við sögu koma morð, svikulir leyniþjónustumenn, brjálaðir prófessorar, Skotar og vitaskuld íðilfagrar konur.
39 þrep hlaut hin virtu Olivier verðlaun sem besta gamanleikritið árið 2007 og tvenn Tony verðlaun árið 2008. Leikritið hefur gengið fyrir fullu húsi á West End á þriðja ár.
Leikarar í sýningunni eru Atli Þór Albertsson, Björn Ingi Hilmarsson, Jóhann G. Jóhannsson og Þrúður Vilhjálmsdóttir. Leikmynd hannaði Finnur Arnar Arnarson og búninga Rannveig Eva Karlsdóttir. Halldór Örn Óskarsson hannaði lýsingu og Gunnar Sigurbjörnsson hljóðmynd.

ATHUGIÐ!

Aðeins ein sýningarhelgi!

Miðasala hefst þriðjudaginn 27. apríl og er hægt að kaupa miða í miðasölu Íslensku óperunnar í síma 511 4200 eða á http://www.opera.is/