Mansal á Íslandi – viðbrögð?
Leikfélag Akureyrar stendur fyrir málþingi um mansal í Ketilhúsinu á Akureyri 17. nóvember næstkomandi, í tengslum við sýningu
LA á Lilju. Lilja byggir á sönnum atburðum og segir sögu sextán ára gamallar stúlku frá Litháen sem seld var mansali í
kynlífsiðnað í Svíþjóð árið 2000.
Málþingið hefst með sýningu á Lilju í Rýminu kl. 15.00. Að henni lokinni, um kl. 17.20 hefjast framsöguerindi í Ketilhúsinu og eftir stutt veitingahlé verða pallborðsumræður frá kl. 18.30.
Skráning fer fram í síma 4 600 200 og hér á heimasíðunni.
Í ljósi frétta síðustu vikna er flestum orðið ljóst að mansal er stundað á Íslandi og því vill LA opna umræðuna um þessi mál og leita upplýsinga hjá yfirvöldum um hvernig þau hyggjast bregðast við og einnig að fá að heyra reynslu fagaðila af samskiptum við brotaþola mansals.
Á málþinginu mun Dóms- og mannréttindamálaráðherra, Ragna Árnadóttir flytja framsöguerindi ásamt Margréti
Steinarsdóttur framkvæmdastjóra Alþjóðahúss, Guðrúnu Jónsdóttur forstöðukonu Stígamóta, sem einnig á
sæti í nýstofnuðum viðbragðshópi gegn mansali á vegum lögreglunnar á höfuðborgarsvæðinu, og Fríðu Rós
Valdimarsdóttur, mannfræðingi og höfundi skýrslunnar Líka á Íslandi, sem er niðurstaða rannsóknar á tæplega sextíu
mansalsmálum á Íslandi á árunum 2006-2009. Að framsöguerindunum loknum fara fram pallborðsumræður þar sem ræðumenn sitja
fyrir svörum ásamt fleiri fagaðilum.
