Leikfélag Akureyrar - LA

JÓN GUNNAR ÞÓRÐARSON - er leikstjóri Rocky Horror og Þögli þjónninn
Jón Gunnar Þórðarson útskrifaðist með BA próf í leikstjórn frá Drama Centre London vorið 2006. Fyrir námið leikstýrði hann fjölda áhugaleiksýninga. Á öðru ári sínu í Drama Center var hann ráðinn aðstoðarleikstjóri hjá The Royal Shakespeare Company í Stratford. Eftir námið hefur Jón Gunnar leikstýrt  Ode to the Sea sem var sýnt í The Cochrane Theatre í London, Danny and the Deep Blue Sea í The Etcetera Theatre, en sú sýning kom seinna til Íslands og var sýnd í Silfurtunglinu, óperunni Galdraskyttan á Listahátíð 2006 í Þjóðleikhúsinu og Draugadans sem var sett upp af MH.
Jón Gunnar var aðstoðarleikstjóri í Kommúnan sem Vesturport setti upp í Borgarleikhúsinu. Sumarið 2008 stofnaði hann fyrirtækið Heyr heyr sem sér um hljóðvinnslu og gaf út Íslenskar Þjóðsögur 1 og 2 á geisladiskum. Jón Gunnar er stofnandi leikfélagsins Silfurtunglið og á vegum þess setti hann upp sýninguna Lilja en verkið skrifaði hann sjálfur og byggir það á kvikmyndinni Lilya 4 ever. Sýningin var sýnd í The Contact Theatre í Manchester 2008 og hlaut einróma lof gagnrýnenda ytra. Hann leikstýrði Fool for Love og sú sýning fékk 7 tilnefningar til Grímunnar 2008, og leikritinu Jólasaga með Ladda í Loftkastalanum. Hjá LA leikstýrði Jón Gunnar Falið fylgi leikárið 2008-2009. Síðasta leikár var hann fastráðinn leikstjóri hjá LA og leikstýrði þá Lilja og hóf æfingar á Rocky Horror, ásamt því að standa fyrir Leikhússporti og sjá um flesta leiklestra sem LA bauð upp á sl. vetur. Í vetur mun Jón Gunnar leikstýra Þögli þjónninn eftir Harold Pinter, sem verður frumsýnt í október.