Leikfélag Akureyrar - LA

Annar hópur Leiklistarskólans mun sýna söngverkið Líf og friður á Kirkjulistaviku í Akureyrarkirkju í byrjun maí og einnig munu yngri hópar vera með opna tíma á sviði LA í lok annarinnar.

Vorönn Leiklistarskóla Leikfélags Akureyrar hófst í janúar.  Skólinn, sem ætlaður er fólki á aldrinum 8-15 ára, hóf starfsemi vorið 2009 með tveimur 4ra vikna námskeiðum. Það var svo um haustið sama ár sem námið var lengt og gert ítarlegra. Á vorönn 2010 stunduðu rúmlega 70 ungmenni nám við skólann,  í haust voru nemendurnir 65 sem og nú á vorönn. 

Skólinn er í stöðugri þróun og námsskráin í sífelldri endurskoðun.  Nú stendur hver önn í 12 vikur og kennt er einu sinni í viku, 90 mínútur í senn. 

Kennarar við Leiklistarskólann á vorönn eru Berglind Jónsdóttir og Ásta Magnúsdóttir.

Námið nú á vorönn hefur verið enn fjölbreyttara, komið víða við í heimi leiklistarinnar, og námið tengt starfsemi Leikfélags Akureyrar enn meira. Eins og venjulega mun önninni ljúka með sýningum og opnum tímum á leiksviðum LA.

Haustönninni lauk í lok nóvember. Nemendur höfðu unnið í nokkrum 10 nemenda hópum og var nemendum skipt eftir reynslu, í þrjá hópa. Einn hópurinn hélt opinn tíma fyrir ættingja og vini, annar hópurinn sýndi í lokaverkefni sínu ýmsa leiki frá því í gamla daga og fór með limrur, sá hópur sýndi á Hlíð, við mikinn fögnuð íbúanna, og hafði svo aðra sýningu í Samkomuhúsinu. Þriðji hópurinn æfði síðan og sýndi leikritið Gegnum holt og hæðir í Rýminu, sýningar voru fyrir almenning og var góð aðsókn að þeim.